siddhānta-darpaṇaḥ (śrī-baladeva-vidyābhūṣaṇair viracitaḥ), prathamā prabhā

śrī-baladeva-vidyābhūṣaṇair viracitaḥ
śrī-nanda-miśra-racita-ṭippaṇyā samalaṅkṛtaḥ

Credits:Jagadananda Dasa(Jagat) and Demian Martins

The following manuscripts were used to prepare this critical edition

ka) Siddhānta-darpaṇaḥ, Nanda-miśra-ṭippaṇī-sahitaḥ, Haridāsa dāsa, Navadvip, Gaurābda 457 (AD 1943).
kha) Siddhānta-darpaṇaḥ, Nanda-miśra-ṭippaṇī-sahitaḥ, Gaura-Gopāla Gosvāmī, Bengali characters, undated.
ga) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at Sarvabhauma Madhusūdana Library, Śrī Rādhā-ramaṇa Mandir, Vṛndāvana, Saṁvat 1892 (AD 1835).
gha) Siddhānta-darpaṇaḥ, published by Sundarānanda Vidyāvinoda, Bengali characters, undated.
ṅa) Siddhānta-darpaṇaḥ, Bhaktisiddhānta-kṛta-gauḍīya-bhāṣyopetaḥ, Sajjana-toṣaṇī, Gaurābda 441 (AD 1927), The Harmonist (reprint of 2006).
ca) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Krishnapur Mutt, Udupi, undated.
cha) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Jaipur, transcribed by Gaṇgā-sahāya, Saṁvat 1944 (AD 1887).
ja) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Udaipur, transcribed by Rādhā-Kṛṣṇa dāsa, Saṁvat 1889 (AD 1832).
jha) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Udaipur, transcribed by Hari-cayana Miśra, undated.
ña) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Alwar, transcribed by Vihārī Lāl Miśra, Saṁvat 1880 (AD 1823).
ṭa) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Jodhpur, accession number 6561, undated.
ṭha) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Jodhpur, accession number 35076, undated.

ḍa) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Jodhpur, accession number 36224, Saṁvat 1829 (AD 1772).
ḍha) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Rajasthan Oriental Research Institute in Jodhpur, accession number 38210, undated.
ṇa) Nanda-miśra-kṛta-siddhānta-darpaṇa-ṭippaṇī, manuscript preserved at the Bhāratīya Kalā Bhavan, Banaras Hindu University, undated.
ta) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Nimbārka Sanskrit Mahāvidyālaya in Vṛndāvana, transcribed by Gaṅgā Rāma, Saṁvat 1889 (AD 1832).
tha) Siddhānta-darpaṇaḥ, Nanda-miśra-ṭippaṇī-sahitaḥ, manuscript in Bengali characters preserved at Pāṭhabāḍī, Kolkata, accession number 1273, transcribed by Ānanda Nārāyaṇa, Bengali year 1273 (AD 1867).
da) Siddhānta-darpaṇaḥ, Nanda-miśra-ṭippaṇī-sahitaḥ, manuscript preserved at the Bhandarkar Oriental Research Institute in Pune, accession number 740/1884-87, undated.

prathamaḥ prabhā

nāstika-nirāsaḥ

pitā parāśaro yasya śukadevasya yaḥ pitā |
taṁ vyāsaṁ badarī-vāsaṁ kṛṣṇa-dvaipāyanaṁ bhaje ||1||

śyāmo’pi yaḥ śruti-saroruha-bodha-raktaḥ śānto’pi yaḥ syati tamas-tatim antara-sthām |
pratyak-padaṁ diśati yaḥ paramaṁ svagobhir vyāsaṁ tam adbhuta-raviṁ śaraṇaṁ prapadye ||

vedaṁ tad-vācyaṁ ca pareśaṁ durdhiyo nāstikā na manyante | kecic cāstikābhāsāḥ samāśrayanty ardha-kukkuṭīyam | tān etān durmukhān nirākartuṁ siddhānta-darpaṇaṁ nāma prakaraṇaṁ nibadhnan sva-prācā kṛtāṁ śrī-vyāsa-bhaktiṁ tan-mukhe maṅgalatvena likhati—piteti |

bhaje praṇaty-ādibhir anukūlayāmīty arthaḥ | parāśara-pitṛkatvenāsyeśvaratvaṁ vyajyate | kṛṣṇa-dvaipāyanaṁ vyāsaṁ viddhi nārāyaṇaṁ prabhum [vi.pu. 3.4.5] iti śrī-vaiṣṇavāt | śuka-pitṛtvena viśuddha-bhakti-samupadeśitvaṁ ca, tasya bhaktir bhajato vāñchita-siddhi-karīti  ca ||1||

nityaṁ nivasatu hṛdaye caitanyātmā murārir naḥ |
niravadyo nirvṛtimān gajapatir anukampayā yasya ||2||

svayaṁ maṅgalam ācarati—nityam iti | atra kṛṣṇaś caitanyo murāriś ceti trayo’rthā varṇitāḥ | ādye pakṣe murāriḥ kṛṣṇaḥ | caitanyātmā cid-vigrahaḥ | gajapatir grāha-kliṣṭo gajendraḥ | niravadyo vigata-paśu-bhāvaḥ | nirvṛtimān prāpta-pārṣada-tanuḥ | dvitīye caitanyātmā caitanya-nāmā ātmā vigrahaḥ | murāriḥ saṁsṛtikutsā-vināśī | gajapatir utkalādhīśaḥ | niravadyas tyakta-rājasaḥ | nirvṛtimān avāpta-premānandaḥ | tṛtīye murāriḥ sva-pūrva-caturthaḥ | caitanyātmā śacī-sutaika-niṣṭhaḥ | gajapatir gopāla-dāsākhyaḥ kari-rājaḥ | niravadyas tyakta-hiṁsaḥ | nirvṛtimān sat-sevānanditaḥ | atrādya-pakṣo vācyaḥ | antyau tu vyaṅgyau ||2||

yad asmin veda-siddhāntāḥ prakāśante satāṁ priyāḥ |
tenāyaṁ bhaṇyate grantho nāmnā siddhānta-darpaṇaḥ ||3||

prakṛtaṁ granthaṁ stauti—yad iti | veda-siddhāntā vedasya nityatva-bhagavad-rūpatvetihāsa-purāṇa-rūpatva-rūpāḥ prakāśante samyak pratītā bhavantīty arthaḥ | satāṁ vaidikānāṁ hari-bhaktānām ||3||

ekam eva paraṁ tattvaṁ vācya-vācaka-bhāva-bhāk |
vācyaḥ sarveśvaro devo vācakaḥ praṇavo bhavet ||4||

grantham avatārayati ekam iti—etad vai satyakāma paraṁ cāparaṁ ca brahma yad oṁkāra [pra.u. 5.2] iti ṣaṭ-praśnyāṁ vācya-vācakayor īśvaroṁkārayor abhedo darśyate | evam anyatra ca ||4||

matsya-kūrmādibhī rūpair yathā vācyo bahur bhavet |
vācako’pi tatha rg-ādi-bhāvād bahur udīryate ||5||

dvayor bahu-rūpatām āha—matsyeti | vācyaḥ sarveśo yathā matsyādi-rūpair bahu-mūrtis tathā vācako’pi praṇava ṛg-yajuḥ-sāmātharvetihāsa-purāṇādi-rūpair bahu-rūpo bhavati | eko’pi san bahudhā yo’vabhāti [go.tā.u. 1.20]  iti śrī-gopāla-tāpanyām | ekāneka-svarūpāya iti śrī-vaiṣṇave (1.2.3) ca vācyasya bahu-rūpatvam | sarve vedāḥ praṇavādikā (1.3) ity ārabhya, tasya ha vai praṇavasya yā pūrvā mātrā pṛthivy-akāra (2.1) ity-ādinākārokāra-makārārdha-mātrās tasya vācakasya kramād ṛg-yajuḥ-sāmātharvāṇi bhavantīti śrī-nṛsiṁha-tāpanyām abhidhānāt praṇavasya rg-ādi-rūpatvam | evaṁ vā are asya mahato bhūtasya niḥśvasitam etad ṛg-vedo yajur-vedaḥ sāma-vedo’tharvāṅgirasa itihāsaḥ purāṇaṁ vidyā upaniṣadaḥ ślokāḥ sūtrāṇy anuvyākhyānāni iti bṛhadāraṇyakāt (2.4.10) |

itihāsa-purāṇasya vaktāraṁ samyag eva hi |
māṁ caiva pratijagrāha bhagavān īśvaraḥ prabhuḥ ||
eka āsīd yajur vedas taṁ caturdhā vyakalpayat |
cāturhotram abhūt tasmiṁs tena yajñam akalpayat ||
ādhvaryavaṁ yajurbhis tu ṛgbhir hotraṁ tathā muniḥ |
audgātraṁ sāmabhiś cakre brahmatvaṁ cāpy atharvabhiḥ ||
ākhyānaiś cāpy upākhyānair gāthābhir dvija-sattamāḥ |
purāṇa-saṁhitāś cakre purāṇārtha-viśāradaḥ ||
yac chiṣṭaṁ tu yajur-veda iti śāstrārtha-nirṇayaḥ ||

iti vāyu-purāṇe sūtokteś cetihāsa-purāṇayor vedatvam ||5||

ādy-anta-rahitatvena dvayaṁ nityaṁ prakīrtyate |
āvirbhāva-tirobhāvau syātām asya yuge yuge ||6||

athobhayor nityatvam āha—ādy-anteti | ādir janma anto vināśaḥ | tad-rahitatvena vācya-vācaka-rūpaṁ vastu-dvayaṁ nityam ucyate | tam ādi-madhyānta-vihīnam ekam iti kaivalyopaniṣadi (6) | jñājñau dvāv ajāv īśānīśav iti śvetāśvataropaniṣadi (1.9) | tad eva śukraṁ tad brahma tad evāmṛtam ucyate iti kaṭha-vallyām (2.6.1) |

avikārāya śuddhāya nityāya paramātmane |
sadaika-rūpa-rūpāya viṣṇave sarva-jiṣṇave |
apakṣaya-vināśābhyāṁ pariṇāmarddhi-janmabhiḥ |
varjitaḥ śakyate vaktuṁ yaḥ sadāstīti kevalam ||
iti śrī-vaiṣṇave  (1.2.1/1.2.11) ca vācyasya sarveśasya nityatvaṁ prakīrtyate |
vācā virūpa nityayā iti śrutyā (Ṛg Veda,8.75.6)|
anādi-nidhanā nityā vāg utsṛṣṭā svayaṁbhuvā |
ādau vedamayī divyā yataḥ sarvāḥ pravṛttayaḥ ||

iti smṛtyā (Mahābhārata 12,224.55) ca vācakasya vedasya nityatvaṁ prakīrtyata ity arthaḥ |

nanu brahma-viṣṇu-rudrendrās te sarve prasūyanta iti sarveśasya viṣṇor utpattiḥ śrutā (Atharvaśikhā Upaniṣad, 3) | deha-vināśaś ca smaryate bhāratādiṣu | vedasyāpi śabda-rāśitvād utpatti-vināśau durvārau, tataḥ kathaṁ tayor nityatvam ? tatrāha—āvirbhāveti | asyobhayātmakasya vastuno janma-nāśau na staḥ | kintv āvirbhāva-tirobhāvau bhavetām | brahmety-ādi-śrutau viṣṇor utpattis teṣu tasya saṅgatir eva, caureṣv iva rājñaḥ | utpatti-pratiṣedhād eva | deha-nāśo’pi prātītika evaindra-jālikasyeva bodhyaḥ | nityasya nāśāsambhavāt | vedasyāpi nityatvāt tau neti pratipādayiṣyate ||6||

jagataḥ sapratīkatvāt kāryatvaṁ sarva-sammatam ||7||

evam āstikān prati śruty-ādi-pramāṇeneśvara-vedau nityau darśitau | atha vedāvamantṝn nāstikān pratyanumāna-pramāṇena tau tathā darśyete | tatra jagat-kartṛtayeśvaro’numeyaḥ | tad-arthaṁ jagataḥ kāryatvaṁ tāvad āha—jagata iti | sa-pratīkatvāt sāvayavatvāt | aṅgaṁ pratīko’vayavaḥ ity amaraḥ (2.6.70) |

tad ayaṁ prayogaḥ—idaṁ jagat kāryaṁ, sāvayavatvāt, ghaṭavat | yan na sāvayavaṁ na tat kāryaṁ paramāṇuvad viyadvad veti sarveṣāṁ bauddhādīnāṁ tārkikāṇāṁ cābhimatam | etena na kadācid anīdṛśaṁ jagad iti tan-nityatva-vādināṁ karma-jaḍānāṁ matam apāstam | te hy evam anuminvanti—idaṁ jagat na kāryaṁ manasāpy avibhāvyamāna-racanatvāt | na khalu bhū-dhara-sāgarādikaṁ dig-ākāśādikaṁ ca kenacit sumedhasā śakyaṁ manasāpi racayitum  | ato’nādi-siddhaṁ nityam etat | yaḥ kalpaḥ sa kalpa-pūrva iti yukteś cānāditvam asya | īdṛśam api jagat satya-saṅkalpeneśvareṇa sukaram iti tat-parihāro vyaktībhāvī ||7||

saṅghātaḥ paramāṇūnāṁ nāstikair yaḥ prakalpyate |
sa tu sthirasya saṁhantur asvīkārān na sidhyati ||8||

jagad-rūpe kārye matāntarāṇi nirākaroti—saṅghāta iti | pārthivādayaś caturvidhāḥ paramāṇavaḥ pṛthivy-ādi-bhāvena yugapat saṅghātaṁ bhajanta iti bhāva-kṣaṇikatva-vādino bauddhāḥ | pṛthivy-ādi-saṅghāta-hetavaḥ paramāṇavo na caturvidhāḥ, kiṁ tv eka-svabhāvā eva | pariṇāmāt tu pṛthivy-ādi-rūpo viśeṣa ity ārhatā syād-vādinaḥ prāhuḥ | taiḥ kalpito’yaṁ saṅghāto na sambhavati sthirasya saṁhantuś cetanasya tair asvīkṛtatvād iti sūtra-bhāṣye’sya vistaraḥ ||8||

pradhānasya na kartṛtvaṁ jaḍatvād eva sāmpratam ||9||

vibhu-puruṣa-cchāyayā sa-cetanaṁ pradhānaṁ jagat-kartṛ syād iti sāṅkhyā manyyateyate, tān nirasyati—pradhānasyeti | tad ayaṁ prayogaḥ—pradhānaṁ na jagat-kartṛ, jaḍatvāt, kāṣṭhādivat | jñānecchā-prayatnavataḥ kulālāder ghaṭādi-kartṛtvaṁ loke dṛṣṭam | kāṣṭhādi-tulye pradhāne jñānādy-abhāvān na tasya jagat-kartṛtvam | puruṣa-cchāyayā labdha-caitanyaṁ tac cet tat-kartṛ svīkriyate, tarhi puruṣasyaiva tattvam | na khalu taptāyaso dagdhṛtvam ayo-nimittam api tu vahni-nimittam eveti ||9||

īdṛśasya na kartā syāj jīvaḥ śakter adarśanāt ||10||

adṛṣṭa-dvārā jīvo jagat-karteti kecid āhus tān nirasyati—īdṛśasyeti | anekair mahīdharaiḥ sāgaraiś cātyadbhutair upetasya caturdaśa-bhuvanātmakasyānanta-kartṛ-bhoktṛ-yuktasyāsaṅkhyeyabhogya-bhoga-sthāna-ramyasyātarkya-racanasya jagata ity arthaḥ |

tad ayaṁ prayogaḥ—jīvo’smad-ādir na jagat-kartā, tādṛśa-tan-nirmāṇe tasya śakty-abhāvāt | vyatireke īśvaravat | na cādṛṣṭaṁ tasya śaktiḥ | īdṛśasyādṛṣṭasyānupārjanāt | na ca sarvādṛṣṭaṁ tatra dvāram | sarvaiḥ sambhūya tādṛg adṛṣṭam upārjitam ity arthe śruty-ādi-pramāṇābhāvād iti tuccham etat ||10||

ato jñānādibhir dharmair viśiṣṭas tribhir īśvaraḥ |
etasya jagataḥ kartā sa nityaḥ sad-akāraṇaḥ ||11||

tarhi ko’sya jagataḥ karteti cet, tatrāha—ata iti | paramāṇuṣu saṅghāta-kartṛtāyāḥ pradhāne pariṇāma-kartṛtāyāś cāsambhavāj jīve jagan-nirmāṇa-śakter adarśanāc cety arthaḥ | īśvara eva jagat-kartā bhavadbhir anumātavyo gale nipatita iti bhāvaḥ |

tad ayaṁ prayogaḥ—idaṁ jagat sa-kartṛkaṁ, sāvayavatvāt, ghaṭādivat | yan naivaṁ tan naivam | yathā paramāṇur yathā cākāśam iti | tat-kartā ceśvara eva tasyaiva sarvajñasya satyecchasya dvy-aṇuka-mahīdhara-sāgarādi-jagan-nirmāṇe śaktatvāt |

nanv anenānumānena tat-kartā siddho, na tu tat-kartṛtva-nirvāhakaṁ jñānecchādīti cet tad api tenaiva dharmi-grāhakeṇa sidhyatīty āha—jñānādibhis tribhir viśiṣṭa iti | tenānumānena jagat-kartṛtattv siddhyan dharmīśvaraḥ sva-kartṛtva-nirvāhakaṁ jñānecchā-prayatna-lakṣaṇaṁ dharma-trayam ādāyaiva sidhyati, loke tadvataḥ kartṛtva-darśanād ity arthaḥ |

nanv astv īśvaro jagat-kartā kintv anityaḥ saḥ | jagat-kartṛtvāc caturmukhavad iti cet tatrāha—sa iti | hetu-garbhaṁ viśeṣaṇam | tad ayaṁ prayogaḥ — īśvaro nityaḥ sattve saty akāraṇakatvāt | īśvaro nityaḥ, asāntatve saty akāraṇakatvād ākāśavat | vyatireke
yan naivaṁ tan naivaṁ yathā ghaṭa-prāg-abhāvo yathā ca ghaṭaḥ | ghaṭa-prāg-abhāvasyākāraṇatve’py asattvāt | ghaṭasya sattve’pi sakāraṇakatvān na nityatvam | adhikaṁ tu sa eva mūlam ity atra vakṣyate (1.19) | eteneśvaraḥ kṣaṇikaḥ sattvād yat sat tat kṣaṇikaṁ yathā megha ity anumānaṁ nirastam | na ca sattvād iti sad-dhetuḥ, vyāpyatvāsiddhatvāt | tattvaṁ ca vyāpti-grāhaka-pramāṇābhāvāt | na ca sattvasya hetoḥ kṣaṇikatvena saha vyāptau pramāṇaṁ niścitaṁ, sataḥ śailādeḥ kṣaṇikatvādarśanāt | evam etad vede’pi nirastaṁ veditavyam ||11||

nirdoṣeśvara-vākyatvād vedaḥ prāmāṇyam aśnute ||12||

evaṁ jñānādi-guṇakam īśvaraṁ nityam āpādya tad-vākyatvād vedasya prāmāṇyaṁ grāhayati—nirdoṣeti | bhramaḥ pramādo vipralipsā karaṇāpāṭavaṁ ceti vaktṛ-doṣā bhavanti | tad-rahiteneśvareṇa vaktrā prayukte veda-vākye doṣavat-puruṣāpraṇītatvena prāmāṇyasya sahacārāt | tenaiva hetunā tasmin prāmāṇyaṁ siddham | doṣavat puruṣa-praṇītaṁ tu vākyam apramāṇaṁ, yathā kāpilādi-tantram | ayam arthaḥ—chandāṁsi jajñire tasmād (Ṛg Veda,10.90.09) ity-ādi-śruter īśvara-janyatvena yadyapi vedasyānityatvam asandehaṁ, tathāpi nirdoṣa-sarvajña-kṛtatvāt tasya prāmāṇyam abādham, yathārtha-jñāna-karaṇatvāt | kapilādes tu jīvatvena bhramādi-doṣa-sambhavāt tad-vākyam apramāṇam iti |

nanv ṛṣabhasya buddhasya ceśvaratvāt tad-vākyaṁ pramāṇaṁ syāt, maivam | tasya tasya cānumiteśvaratayānaṅgīkārāt | īśvaraḥ khalu nityaḥ sarvajñādi-nitya-guṇako’numitaḥ, syād-vāde kṣaṇika-vijñāna-vāde ca kūṭastho bhāvo nāstīti na tayos tādṛg īśvaratvam, atas tad-vākyam apramāṇam |

kiṁ ca, na khalv arhat-siddhānta ṛṣabhenopadiṣṭo na cārhatāpi sa dṛṣṭaḥ | kintu māyāmayīṁ tac-ceṣṭāṁ lokebhyaḥ śrutvā dur-adṛṣṭa-bhāk sa tāṁ dadhāra, janān dur-adṛṣṭān dharmād bhraṁśayāmāsa | sa ceśvaraḥ karmānusāri-phalam arpayan na viṣama iti bhāṣya-pīṭhake (1.66) nirūpitam | buddhaś cāsurān yajñād bhraṁśayitum  ahiṁsā-vyapadeśena tathopadideśa, na tu tasminn upadeśe tasya tātparya-gandho’pīti tattva-vidaḥ | tathā ca tad-vyāmoha-phalakāptatvāvaraṇa-pūrvakatvāt tad-upadeśasya na prāmāṇyam iti ||12||

dharmi-grāhaka-mānena jñānecchā-kṛtayo yathā |
bhaveyur īśvare siddhās tathā dehendriyāsavaḥ ||13||

evaṁ nāstikān prati nityo nitya-jñānādi-guṇaka īśvaro jagat-kartṛtayā sādhitaḥ | vedasya ca sarvajñeśvara-praṇītatvāt prāmāṇyaṁ sādhitaṁ tārkika-mukhena | tatreśvarasya sa-vigrahatvaṁ vedasya nityatvaṁ ca na siddham | tad idaṁ dvayaṁ sātvataika-deśi-matena sādhayitum āha—dharmīti | yathā loke jñānecchā-kṛtimataḥ kartṛtva-darśanāt kartṛtayānumite īśvare kartṛtva-nirvāhakaṁ jñānādi dharmi-grāhakeṇa tenaivānumānena sādhyate | tathā loke dehādi-mataḥ kartṛtva-darśanāt kartṛtva-nirvāhi dehādikam api sādhanīyam ity arthaḥ | kartṛtvasya dehādi-vyāpyatvāt |

nanu kulālādīnāṁ ceṣṭāṁ vinā kṛti-mātreṇa ghaṭādi-karaṇe’sāmarthyāc ceṣṭāśraya-dehādi bhavati sahakāri | īśvarasya tu kṛti-mātreṇa sarva-karaṇe sāmarthyān na dehāder apekṣeti cet, maivam etat kartṛtva-nirvāhe jñānādimattvasyeva dehādimattvasyāpy anvaya-vyatirekābhyāṁ siddheḥ | yatra kulālādiṣu kartṛtvaṁ, tatra dehādimattvaṁ dṛṣṭam | yatra muktātmasu dehādimattvābhāvas tatra na kartṛtvam iti | na ca sāvayavatvena tad-dehasyāpy anityatvaṁ tasyākarma-janyatvenānityatvābhāvāt | itarathā jñānasyāpy anityatva-niyamena taj-jñānasyānityatvaṁ syāt |

nanu ceṣṭāṁ vināpi prayatna-mātreṇaiva kārya-karaṇe sāmarthyān neśvarasya ceṣṭāśraya-dehādi-svīkāryam iti cen, na, vināpīcchā-prayatnau jñāna-mātreṇaiva tasmin sāmarthyān na tad-icchādikam api svīkāryam ity api suvacatvāt |

nanu dehasya paricchinnatva-niyamena yugapan nikhila-deśa-gata-kāryānupapattir iti cen, naitat caturasram | nityasya tad-dehasyācintya-śaktyā sarvatra yugapat sānnidhyāt | jātivat | yathā gotvādi-jātiḥ prativyakti-paryāptāpi sarvāsu vyaktiṣv ekā, tathā pratikārya-paryāpto’pi tad-dehaḥ sarvatraika eveti na kiñcic chinnam | yat tu mahattvād udbhūta-rūpatvāc ca tad-dehasya pratyakṣatāpattir ity ucyate tac cāpāta-ramyaṁ devādi-dehavad antardhāna-śakti-yogena tasyāpy apratyakṣatvāt | etena kāryasya dehādimat kartṛ-pūrvakatva-niyamo’ṅkurādiṣu dehādimataḥ kartur anupalambhān nirasta iti pratyuktam | yat tu jīvādṛṣṭa-sampādita-dehādikam īśvaro bhūtāveśa-nyāyenāviśya kṛta-kāryas tad-āveśaṁ tyajati na tu tasmin svābhāvikaṁ dehādy asti jñānādi-trayātirikta-viśeṣa-dharmābhāvād ity āhus tad idaṁ kubuddhi-vijṛmbhitam eva | īdṛśa-kalpanāyāṁ pramāṇābhāvān nitya-dehatve pramāṇa-sattvāc ca | tasmād īśvare jñānādivad dehādikam api dharmi-grāhakeṇaiva pramāṇena siddham ||13||

yathā jñānādikaṁ nityam īśvarasya prakīrtyate |
tasya niśvasitaṇ vedas tathā nityaḥ prakīrtyatām ||14||

nanu prakṛte kim āgatam ? tatrāha—yatheti | yatheśvare kartṛtā-nirvāhakaṁ jñānādi-trayaṁ dharmi-grāhaka-mānena tārkikeṇa svīkṛtam, nāstikān prati yuktikaśayā tat svīkāritaṁ, tathāsmābhis tārkikādīn prati tayaiva tan-nirvāhakaṁ dehādi svīkāritam | yatheśvarasya jñānādikam aiśvaratvān nityaṁ, tathā tan-niśvasita-rūpo vedo’py aiśvaratvād eva nitya ity anicchadbhir api taiḥ svīkāryam | etena cchandāṁsi jajñire tasmād iti janyatva-śravaṇāt vedasyāpy anityatvaṁ yan manyante, tan nirastam | janeḥ prādurbhāvārthakatvena vivakṣita-vyāghātāt | yac ca, trayo vedasya kartāro muni-bhaṇḍa-niśācarā iti saugatair vedasya muny-ādi-racitatvam uktaṁ, tad api praty uktam | te hi pāpa-vāsanābhyuditād vidveṣāt tathā kalpayanti | yat tu niśvasitasya vāyu-rūpatvāt tasyākṣara-rāśi-rūpatvam asambhavīty āhus tad apīṣad dhiṣaṇam | avicintyatvena tat-sambhavāt | na hy asmat-prāṇavat tat-prāṇo vāyu-rūpaḥ, kintv aiśvaratvāt tad-vilakṣaṇa eveti kim anupapannam | api ca jalādeḥ kathañcid agny-ādi-rūpatvaṁ syād-vāde vijñānasya ghaṭādy-arthākāratvaṁ vijñāna-vāde bahutva-saṅkhyāyāḥ kārya-sthaulyārambhakatvam ārambha-vāde bruvantas te trayas tan-niśvasitasyātarkyasyākṣara-rāśi-rūpatvaṁ vaktuṁ kathaṁ trapante ||14||

vedasyāpauruṣeyatvam evaṁ kecit pracakṣate |
vedasyādhyayanaṁ sarvaṁ gurv-adhyayana-pūrvakam |
vedādhyayana-sāmānyād adhunādhyayanaṁ yathā ||15||

atha vaidikaika-deśi-matena vedasyāpauruṣeyatvaṁ tāvad āha—nanu vedaḥ pauruṣeyaḥ, śāstratvāt smṛti-śāstravat, kāṭhakādi-saṁjñātaś ceti cet, tatrāha—vedasyeti | kecid iti asmad-ukta-lakṣaṇaṁ vedam asvīkurvantaḥ karma-jaḍā ity arthaḥ | apauruṣeyatve teṣām anumānaṁ darśayati—vedasyeti | vedādhyayanaṁ sāmānyaṁ pakṣaṁ kṛtvā gurv-adhyayana-pūrvakatve sādhite pariśiṣṭam apauruṣeyatvaṁ sidhyed eveti  bhāvaḥ ||15||

tṛtīya-kṣaṇa-vidhvaṁso yaḥ śabdasyocyate paraiḥ |
sa tu bhramaḥ syān nityasya tirobhāvas tu yujyate ||16||

vedānityatva-vādinas tārkikāṁs tan-mukhena nirākaroti | nanu vedo nityo na, śabda-rāśitvāt | śabdasya cotpannaḥ kho vinaṣṭaḥ ka iti buddher anityatvam asandeham iti cet, tatrāha—tṛtīyeti | śabdasya tṛtīya-kṣaṇa-dhvaṁsa-pratiyogitvaṁ yat tad buddhy-udayāt tārkikair ucyate, sa khalu bhrama eva | tathā bruvantas te bhrāntā ity arthaḥ | vastutas tu nityasya tasya tirobhāva eva yukta ity āha—nityasyeti | tad ayaṁ prayogaḥ—śabdo nityaḥ, nityākāśa-guṇatvād ākāśa-niṣṭha-mahā-parimāṇavat | vyatireke ghaṭādi-niṣṭha-hrasvatvādivat | anityatve śabda-guṇam ākāśam iti lakṣaṇāsiddhiḥ | vāyu-preraṇāpreraṇābhyām śabdasya vyakty-avyaktī syātāṁ na tu svarūpa-vināśātmā dhvaṁsaḥ | na hi ghaṭe gṛhāntar-nihite tasya dhvaṁsaḥ śakyate vaktum | vyakty-avyaktī āvirbhāva-tirobhāvau | evaṁ ca śabda-mātrasya nityatvaṁ siddham ity ākāśe nityatvāśrayaṇe tārkika-matenānumānam etat | tad anityatva-vāde tv āpekṣikaṁ tad amṛtā devā itivat ||16||

īśvaro vibhur vijñāna-sukhātmā śrutibhir mataḥ |
vijñāna-ghana-śabdāder mūrtaḥ sa tu tathāvidhaḥ ||17||

evaṁ tārkika-yuktyā nāstikān pratīśvara-vedau jagat-kartṛ-pramāṇa-bhūtau nirūpya sātvataika-deśi-yuktyā ca tārkikān prati tau sa-vigraha-nityau pradarśya teṣu cārjavaṁ gateṣu tayor yāthātmyaṁ śruti-nayena svayaṁ vaktuṁ pravartate—īśvara ity ādibhiḥ | vibhu-vijñānānanda-rūpo ya ātmā sa eveśvaro, na tu vidyopādhiḥ sattva-tanuḥ | vijñānam ānandaṁ brahma, (Bṛhad-āraṇyakopaniṣad, 3.9.28) mahāntaṁ vibhum ātmānam (Kaṭhopaniṣad 1.2.4) ity-ādi-śrutibhyaḥ |

sa ca tathā-bhūto mūrta evety āha—vijñāneti | vijñāna-ghanānanda-ghanety-ādi-śruter evety arthaḥ | mūrto ghana iti bhagavān pāṇiniḥ | kaṭhinye’rthe hanter ap ghanaś cādeśa (Aṣṭādhyāyī 3.3.77) iti sūtrārthaḥ | anyathā śrutir vyākupyet | tasya mūrtatvaṁ tv acintya-śakti-siddham | acintya-śaktiḥ puruṣaḥ purāṇa ity ādi śruteḥ ||17||

viśeṣād dehi-bhāvena guṇitvena ca sa prabhuḥ |
sattāstīty-ādivad bhāti viduṣām api sarvadā ||18||

sa nirbhinna eveśvaro viśeṣa-balād deha-dehi-bhāvena guṇa-guṇi-bhāvena ca viduṣām api bhāsate | sattā satī kālaḥ sarvadāstīty ādau sattādeḥ sattādy-āśrayatvavat | na ca sattā satīty-ādi-buddhir bhramaḥ | sat ghaṭa ity-ādivad abādhāt | na cāropaḥ | siṁho devadatto netivat sattā satī neti kadāpy avyavahārāt | na ca sattādeḥ sattādy-antarābhāve’pi svabhāvād eva satīty-ādi-vyavahāraḥ | tasyaiveha tac-chabdenokteḥ | tasmān nirbhede’pi vastuni bheda-vyavahāro viśeṣād eva | viśeṣaś ca bheda-pratinidhir na bhedaḥ | sa cārthāpatti-siddho’vaśyam abhyupeyaḥ | taṁ vinā viśeṣaṇa-viśeṣya-bhāvādikaṁ na sambhavet | sa ca vastv-abhinnaḥ, sva-nirvāhakaś ceti nānavasthā | tasya tādṛśatvaṁ ca dharmi-grāhaka-pramāṇa-siddhaṁ jagat-kartur iva sārvajñādīty-adhikaṁ tu bhāṣya-pīṭhaka (1.15-22)-syamantakeṣu (2.23) vilokanīyam ||18||

sa mūlaṁ kila sarvasya na mūlaṁ tasya vidyate ||19||

nanu jagan-mūlatattv kīrtyamānasyāpi viriñcāder nārāyaṇa-mūlakatva-kīrtanān nārāyaṇasyāpi kiñcin mūlaṁ bhāvīti cet, tatrāha—sa mūlam iti | sa pareśo nārāyaṇaḥ sarvasya kāryasya mūlam | mūlaṁ viṣṇur hi devānām (Bhāg. 10.4.39) ity ādi-vacanebhyaḥ | na hi tasya mūlam asti, mūle mūlādarśanāt | evam evāha kapilo mūla-prakṛtiṁ nirūpayan—mūle mūlābhāvād amūlaṁ mūlam (sāṁkhya-sūtre 1.67) iti | sarveṣāṁ vādināṁ khalu mūla-kāraṇaṁ kiñcid abhyupeyam | anyathānavasthāpattir durvārā viriñcāder mūlatvaṁ tu bhrāntānuvāda-rūpam ato na teṣāṁ tattvam | yat tvayā mūlaṁ vaktavyaṁ tad asmākaṁ nārāyaṇa iti ||19||

acintya-śakti-sambandhād veda-rūpo vibhāty asau ||20||

evaṁ dharmiṇam īśvaraṁ nityam āpādya vedaṁ nityam āpādayati—acintyeti | asau caturbhuja-devākāro nārāyaṇo yathācintya-śaktyā tad-vilakṣaṇo haṁsādis tathā niḥśvasitāṁśenāviṣkṛtākṣara-rāśir anādito vibhātīti nityatvaṁ vedasya siddham | evam evoktaṁ śrutau—etad vai satyakāmety ādinā (Praśnopaniṣad  5.2) | tathaiva ṣaṣṭhe—vedo nārāyaṇaḥ sākṣāt svayambhūr iti śuśruma (Bhāg. 6.1.40) iti ||20||

yad asau vācako’bhyeti krameṇaikena sarvadā |
āvirbhāva-matas tasya budhā nityatvam ūcire ||21||

nārāyaṇa-rūpatvān nityatvaṁ vedasya śabdād āpāditam | athānumānenāpi tad āha—yad iti | asau vācako vedo yena krameṇa yathā-svara-varṇa-ghaṭitayānupūrvyā pūrva-kalpe īśvarād āvirbabhūva | tenaiva krameṇa para-kalpe’py āvirbhavaty atas tasya nityatvaṁ budhāḥ svāyambhuvādaya ūcire | tad ayaṁ prayogaḥ—vedo nityaḥ | ekānupūrvikatattv pratikalpam āvirbhāvāt | yathaika-svabhāvatattv punaḥ punar āvirbhavan matsya-kūrmādir īśvarāvatāraḥ | yan naivaṁ, tan naivaṁ, yathā muhur muhur utpadyamāno’smad-ādir jīva-deha iti ||21||

syān nityākṛti-vācitvāt kartr-abhāvāc ca nityatā |
kāṭhakādi-samākhyā tu tad-uccāraṇa-hetukā ||22||

anumānāntaram āha—syād iti | vedo nitya indrādy-arthākṛti-vācitvāt | gotvādi-vāci-gavādi-śabdavat | yan naivaṁ, tan naivaṁ, yathā yajñadattādi-śabdaḥ | yathā gotvādi-jātayo nityās tathendrādy-arthākṛtayaś ca | viśvakarma-nirmita-śāstre etā ākṛtayaḥ prasiddhāḥ | citra-karma-prasiddhaye indraṁ vajra-hastaṁ varuṇaṁ pāśa-hastaṁ yamaṁ daṇḍa-hastaṁ  likhanti | indrādi-vyakty-utpatteḥ pūrvaṁ sthitāyāḥ smṛtvā viriñcis tat-tad-vyaktīḥ sṛṣṭavān, ato nityās tāḥ |

aparam anumānam āha—vedo nityaḥ, kartṛ-śūnyatvāt kālavat | yan naivaṁ, tan naivaṁ, yathādhunika-kāvyādiḥ | śabdānityatva-pakṣe niyatānupūrvābhāvād yajñadattādi-śabdānām ādhunika-kāvyādīnāṁ cānityatvaṁ bodhyam |

nanu nityaś ced vedaḥ kartṛ-śunyatvāt tarhi kāṭhakādi-saṁjñā tasya katham ? kaṭhena proktaṁ kāṭhakam ity ādi tad-vyutpatter iti cet, tatrāha—kāṭhakādīti kaṭhena proktam uccāritaṁ, na tu racitam | nityatva-śravaṇa-vyākopād iti kaṭhādīnāṁ yad uccāraṇaṁ tad dhetukety arthaḥ |

etad uktam bhavati—mahā-pralayāvasāne sarveśvareṇākṛti-vidā sṛṣṭo’dhyāpita-vedaś ca brahmā vaidikaiḥ kaṭhādi-śabdais tu tat-tad-ākṛtīr vicintya tat-tad-vyaktīs tat-tac-chakti-yuktā nirmāya tad-upādhīñ jīvān tat-tad-grantha-pravartane viniyuṅkte | te’pi tat-tad-datta-jñāna-śaktayaḥ pūrva-pūrva-kaṭhādi-pravartitāṁs tān svarato varṇataś cāskhalitān adhītya pravartayantīti nityatvaṁ vedasya siddham | evam āha śrutiḥ—yo brahmāṇaṁ vidadhāti pūrvaṁ yo hi vedāṁś ca prahiṇoti tasmai iti (Śvetāśvataropaniṣad 6.18)| smṛtiś ca—

yathartāv ṛtu-liṅgāni nānā-rūpāṇi paryaye |
dṛśyante tāni tāny eva tathā-bhāvā yugādiṣu |
yugānte’ntarhitān vedān setihāsān maharṣayaḥ |
lebhire tapasā pūrvam anujñātāḥ svayambhuvā || ity ādyā | (Mahābhārata, Ādi-parva, 1.37/ Śānti-parva, 203.17)

evaṁ purāṇeṣu mārkaṇḍeyādi-saṁjñāś ca bodhyāḥ ||22||

jīva-vākyeṣu labhyante jīva-dharmā bhramādayaḥ |
vede tu naiva te santi sarvajña-vacanoccaye ||23||

vedasya nirdoṣatvaṁ vaktum āha – jīveti | bhramaḥ pramādo vipralipsā karaṇāpāṭavaṁ ceti catvāro jīveṣu doṣāḥ | tatrātasmiṁs tad-buddhir bhramaḥ | anavadhānatā pramādaḥ | svapratīta-viparīta-pratyāyanaṁ vipralipsā | indriya-māndyaṁ karaṇāpāṭavam | jīvāḥ khalu śuktikādiṣu rajatādīni pratiyanti | svāntike jāyamānaṁ gānam anyatra nihita-manaso na śṛṇvanti | jñāna-khalāḥ svāvagatān apy arthān śiṣyeṣu na prakāśayanti | nihita-manaso’pi karaṇa-māndyād yathāvad vastūni na gṛhṇantīti prasiddham | ta ete doṣās tad-vākyeṣu saṁkramante | ataḥ kapilādi-siddhāntānāṁ parasparaṁ vyāhatir dṛṣṭā | na tv ete doṣā vede santi tasya bhagavad-rūpatvena sarva-jñatvāt || 23 ||

sādhanaṁ yat phalaṁ cāha yathāyaṁ yad viśāradaḥ |
tathaiva sarvair nipuṇair yathoktaṁ tat pralabhyate ||24||

nirdoṣatve hetum āha—sādhanam iti | ayaṁ viśāradaḥ sarvajño vedaḥ | yat sādhanaṁ kārīryādi yathāha tasya phalaṁ ca vṛṣṭy-ādi yadāha tat tathaiva sarvair nipuṇair yathoktaṁ pralabhyate’nubhūyate | kārīryā vṛṣṭiḥ putreṣṭyā putraḥ | jyotiṣṭomena svargaḥ | jñānena mokṣaś cocyate vedena, tat sarvaṁ yathāvad dṛṣṭa-mato bhramādi-doṣa-śūnyo vedaḥ ||24||

ato brahmādibhir devair vaśiṣṭhādyair maharṣibhiḥ |
manvādyaiś cāpi vedo’yaṁ sarvārtheṣūpajīvyate ||25||

nipuṇāḥ sarve te ke ity apekṣāyām āha—ata iti | yasmān nityo nirdoṣo vedaḥ, ato brahmādibhir mahattamaiḥ sarvaiḥ sarveṣu dharmārtha-kāma-mokṣeṣu phaleṣu nimitteṣv eva veda upajīvyate āśrīyate, tad uktāny anuṣṭhāya tat-phalāny avāpyanta ity arthaḥ ||25||

brahmādyair arcito’py eṣa yadi kaiścin narādhamaiḥ |
ghūkair iva ravir nābhivīkṣyate tasya kā kṣatiḥ ||26||

nanu yad īdṛśo vedas tarhy arhadādayaḥ kathaṁ tam avamanyante ? tatrāha—brahmādyair iti | tair mahattamair idānīntanaiś ca mahadbhiḥ sarvair arcitaḥ samāśrito’py eṣa vedo yadi saugatādibhiḥ kaiścin manuṣyāpasadair ulūkair bhānur iva nābhivīkṣyate nāṅgīkriyata ity arthaḥ | tarhi asya kāpūjyatā-lakṣaṇā kṣatiḥ syāt ? na kāpīti | yathā deva-mānavādibhiḥ sarvaiḥ sat-kriyamāṇaḥ sūryas taru-koṭareṣu nihnuvānair ghūkair na vīkṣyate, naitāvatā tasya prabhāva-hānis tadvat | tathā ca pāmarāṇāṁ kā katheti ||26||

arhat-prabhṛtayaḥ śāstre svakīye yat phalaṁ jaguḥ |
tan naiva labhyate kvāpi tatas tat kalpitaṁ bhavet ||27||

|| iti siddhānta-darpaṇe nāstika-nirāsaḥ prathamā prabhā ||

arhad-ādi-śāstrasya kalpitatvāt tad-ukta-sādhanāt sādhyaṁ nāstīty āha—arhad iti | te hy evaṁ kalpayanti | ātma-dharmādharma-pudgala-kālākāśāḥ ṣaṭ-padārthās teṣāṁ syād-astīty-ādi-rūpeṇa sapta-bhaṅginā nyāyenāsthairya-bhāvanam | ghāty-aghāti-śabda-vācyena pāpa-puṇya-rūpeṇa karmāṣṭakena veṣṭitasya jīvasya samyag-darśana-jñāna-cāritraiḥ sādhanair āvṛtais tad-aṣṭakāt pañjarāt kīrasyeva vinirgatasya tasyālokākāśa-vartinyām ativistīrṇāyāṁ śilāyām āroho muktir iti | na caitat kenāpi kutrāpi pratītaṁ mālatī-mādhavādi-nāṭakārthavat prakalpanay  nibaddhatvāt | na caitan-mata-sthānāṁ kiñcin mokṣa-cihnaṁ—pratyakṣa-nārakitvenāvagatatvāt | evaṁ bauddhānāṁ ca bhāva-kṣaṇika-vādināṁ na kāpy āstheti | kā kathā teṣām iti nāstikā nirākṛtāḥ ||27||

|| iti prathamā prabhā vyākhyātā ||

  1.   (ga) siddhiṁ karoti ca.prathamā prabhā
  2.   These verses were quoted by Jīva Gosvāmī in his Tattva-sandarbha, 14.1. A similar passage appears in the Viṣṇu Purāṇa from verse 3.4.11, in the Kurma Purāṇa from verse 1.5.15, and in the Brahmāṇḍa Purāṇa from verse 1.34.16.
  3.   (ga) iti smṛtyā ca vācya-vācakasya nityatvaṁ prakīrtyate ity arthaḥ |
  4.  (gha),(ṅa) sa tu kāraṇam.
  5.   prāṇi-karmānurūpa-phala-prado bhagavān nāyaṁ deho deha-bhājām ity ādi-diśokty-upadiṣṭa-niṣṭhān śiṣyān prati parataḥ mūrtitvenāvagataḥ prayacchati tebhyas tad-abhīṣṭāni ity ādi ||
  6.   (ga) nirvāhanīyam ity arthaḥ |
  7.   ātma-janyā bhaved icchā icchā-janā bhavet kṛtiḥ |
    kṛti-janyā bhavec ceṣṭā taj-janyaiva kriyā bhavet || [vai.vi. 5.1.1]
  8.   trayo vedasya kartāro bhaṇḍa-dhūrta-niśācarāḥ iti sarva-darśana-saṅgrahe cārvāka-darśanam ||
  9.   śloka-vārtikasya vacanam idam.
  10.   mīmāṁsā-nyāya-prakāśa-ṭīkāyāṁ—atra sarva-śabdena nikhila-śākhā-sambandhi vedādhyayanaṁ gṛhyate, na tu nikhila-kāla-vṛtti, ataś ca atīta-kāla-vṛtti nikhila-śākhādhyayanasya pakṣatvaṁ bodhyam | evaṁ gurv-adhyayna-pūrvakatvaṁ sādhyaṁ, vedādhyayantvaṁ hetuḥ, ādhunikādhyayanasya dṛṣṭāntateti vivekaḥ ||
  11.   This verse is quoted by Jīva Gosvāmī in his Paramātmā Sandarbha, Anuccheda 58, as belonging to the Śvetāśvatara Upaniṣad.
  12.  anupapadyamānārtha-darśanenopapādakārthāntara-kalpanam arthāpattiḥ ||
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s